唔好咁開心住,聽吓財爺曾俊華點講。佢近日話,雖然今年印花稅收入有增加,賣地收入亦有可觀進帳,但係根據現時資料嚟推算,本年度仲係會有四百億元財政赤字。其實,早前曾蔭權就實牙實齒話,本年度一定會錄得財赤。兩兄弟一唱一和,搏命呻窮,都唔知搞邊科。
之不過,四大會計師行之一嘅羅兵咸永道就話,按現時情形睇,政府庫房今年唔會錄得赤字,估計仲有五十幾億盈餘,財政儲備仲可望達到五千億,足夠政府二十一個月嘅開支。堂堂財爺畀人哋踢爆計錯數,你話幾冇面。
話時話,鬍鬚曾已經唔係第一次扮窮o架啦,上年度財政預算案公布之前,佢亦係整色整水,話會有巨額赤字,點知唔單止冇赤字,仲有可觀嘅盈餘。
正所謂司馬昭之心路人皆知,鬍鬚曾喺度呻窮,都係為咗唔派糖啫。最搞笑嘅係,佢本來係縮骨,但係又要扮到憂國憂民咁款。佢話喎,依家環球經濟雖然已見到復甦「綠芽」,但係根基仲未穩固,或者會出現反覆,香港唔應該盲目樂觀咁話。
咁又奇嘞,鬍鬚曾早排唔係講過,香港經濟已經過咗最壞嘅時候,就好似「隧道盡頭見到曙光」嘅咩,點解依家又咁悲觀呀?
又有乜咁奇噃,佢份人不嬲慣咗「今日嘅我打倒昨日嘅我」o架啦。冇錯,佢的而且確唱好過香港嘅經濟,仲唔知講得幾開心添。之不過,當時佢吹水唔抹嘴,係要證明政府應付金融海嘯幾咁成功。
依家就唔同嘞,新嘅財政預算案就要出爐,被金融海嘯搞到冇啖好食嘅各界市民,都要求政府攞錢出嚟紓解民困。政府平時大花筒,益自己人嘅時候不知幾手爽,早排為紀律部隊變相加人工,每年涉及額外開支八億,一啲都唔心痛。但係一講到派糖,就好似割佢哋嘅肉咁慘。鬍鬚曾講到明,派糖唔係解決問題嘅良策,只可以針對性咁扶助弱勢社群。
對呢個問題,太一叮係咁睇嘅,冇錯,呢排香港經濟係有好轉,股市樓市都暢旺,政府係最大受益者,但係大部分基層市民都冇受惠,好多人喺金融海嘯被裁員減薪,生活百上加斤,唔知何年何月至「見到曙光」。
政府依家庫房水浸,係咪應該攞啲錢出嚟幫吓佢哋先?唔通又要留番嚟為公務員加人工?叮!