澳洲出名有樹熊，而保安局副局長黎棟國（圖）屋企都有隻，就係佢個十八個月大嘅孫女。黎Sir嘅公子早年移居澳洲，早前添咗個千金，令黎家喜氣洋洋，黎Sir同太座唔單止喺早前放假期間密密飛去澳洲探孫，仲用心良苦，喺電腦裝咗Skype，日日越洋同孫女玩。
唔知係唔係黎Sir上任保安局後工作忙咗，唔得閒喺網上見孫女，最近聖誕佢囝囝帶埋小B女返嚟，竟然對爺爺生疏咗、怕醜咗，見到陌生人唔瞅唔睬，仲要爹哋媽咪抱，好似樹熊咁。黎Sir話本來想帶埋小B女見吓老友，但怕佢唔睬人，都係無謂勉強。
由於負責校園驗毒計劃，黎Sir畀人改咗個花名叫「毒王」，不過佢話花名呢樣嘢其實都冇所謂啦，但似乎叫「禁毒王」意思啱啲。佢仲話政府嘅禁毒宣傳即將有新一輪攻勢，但具體情況就唔講得住，至於強制驗毒嘅諮詢工作，佢就話遲啲啦！