商務及經濟發展局副局長蘇錦樑遞卡片「撻朵」替菲傭續約，入境處檢討後認為現行保障申請人嘅私隱制度完備，行使酌情權亦恰當，處方冇人遭「秋後算帳」。
雖則無論蘇錦樑或入境處人員都係最後冇事，但仲係有人覺得唔多妥當，例如立法會保安事務委員會副主席涂謹申就認為入境處雖有酌情權，但今次事件後巿民會要求該處行使酌情權公平啲，即要求佢哋可獲蘇錦樑同等嘅待遇，難怪連香港入境事務助理員工會主席劉玉輝都話，呢件事對前線人員構成一定壓力。
之不過，香港海外女傭僱主聯會副主席羅君典就認為蘇錦樑「撻朵」嘅做法唔應該，應自我檢討。佢認為事件唔屬於嚴重違規，仲希望其他僱主千祈唔好學佢，仿照申請表提示提交足夠的證明文件，包括入息證明文件。
咁講，蘇錦樑依家留咗個烙印，擺明係個壞榜樣囉！聞說蘇錦樑對事件都好後悔，話唔能原諒自己。希望佢真係經一事，長一智啦！