平日嘅內會都係有事准奏、無事退朝，快起上嚟半個鐘就收工。偏偏下禮拜五嘅內會要推選議員加入調查委員會，調查白鴿黨議員甘乃威嘅「示愛事件」。早前都講過呢個規定有七名委員嘅調查委員會，喺泛民杯葛、建制派冇人肯入嘅形勢下，即使到時好彩湊夠數，反對調查嘅議員又會乘機再嘈一次。試問唔搞番一粒鐘，班議員又點會肯收口呢？
無獨有偶，民政事務局局長曾德成因為衰多口話大澳唔和諧，繼而演變出嚟嘅「河蟹事件」餘波未了，福利事務委員會要求用《立法會（權力及特權）條例》調查，並要上內會尋求支持。呢單嘢又係排咗期喺下禮拜五嘅內會上討論，到時一輪口舌之爭勢必在所難免。
保守估計，單係上述兩單嘢已經要玩兩粒鐘，所以下午兩點半開波嘅內會，能夠喺四點半開完已經還得神落。就係咁，財委會主席劉慧卿收到立法會秘書處嘅通知，財委會未必能夠準時喺三點開波。
難為政府仲話三點鐘開始召開六個鐘嘅車輪會，須知道下禮拜五嘅財委會唔止高鐵項目有爭議，連撥款畀十八區區議會搞活動嘅項目一樣惹火，加埋北大嶼山醫院第一期、擴建文錦渡食物檢驗設施工程同埋屯門公路巴士轉乘站工程等，下禮拜五嘅財委會分分鐘變成史上最長嘅一次！