幾間大專院校發起嘅「大專飢饉24」尋日開幕，民政事務局局長曾德成以嘉賓身份，同現場百幾名大學生分享對饑饉嘅體驗。
德成局長憶述年少試過捱餓，令佢知道番薯冇飯咁襟飽，有飯食嘅時候，就算啲飯跌咗落地，佢都會唔理衞生、不顧尊嚴執番嚟食，但最經典嘅莫過於佢試過餓到夢見雞尾包。除咗飢餓，佢用成語野人獻曝作為引子，講述年少時被迫着住件短袖衫，喺十度低溫下度過咗超過一個月，突然有一日出太陽，佢形容當時嗰種溫暖係「一般人感受唔到」。
追問佢幾時有過呢啲體驗，佢心照不宣，話大家應該知道o架啦！睇怕佢講嘅應該係上世紀六七暴動期間，佢因為派發反殖民地單張而鋃鐺入獄兩年時嘅往事嘞！