好多立法會議員都趁住聖誕新年放假出外充電抖吓氣，但Starry李慧琼就話佢冇呢個福分。Starry話囡囡放完聖誕新年假就有中期考試，上年佢就帶咗囡囡去旅行，點知搞到個女成個心散晒，最後考試成績唔理想。有舊年嘅慘痛經驗，佢除咗為囡囡請補習老師，仲決定一放假就重拾媽媽嘅角色，親自督促個女溫習，但就搞到自己同返工一樣咁忙。
之不過，佢話自己唔算係嚴格嘅媽媽，唔要求個女年年考第一，反而戥個女辛苦，因為依家嘅小學課程難咗好多！咁唔知佢有冇試過畀個女嘅功課考起呢？佢就笑笑口話平時好少管個女讀書，呢個重任已交咗畀老公同補習老師嘞！
