青島叻過香港

點解IT豪忽然咁激心呢？事緣係佢喺聖誕假期同屋企人去青島玩咗四日三夜，本來只係貪近揀青島，點知短短幾日就大開眼界，大讚當地保育同文化旅遊做得出色，香港完全被比下去。

IT豪其實都唔算係去咗好多地方，但所到嘅都係好有文化氣息，包括青島炮台遺址、戊戌政變主角康有為故居，同埋全國最大啤酒商青島啤酒嘅酒廠。睇完咁多名勝，IT豪唔單止冇開心到，反而仲愁咗，因為心痛香港完全冇適當嘅保育政策，白白浪費咗本土文化。

佢話青島同香港其實有好多相似嘅地方，例如兩地都曾被外國管治過，又有好多名人生活過。既然大家有咁多共同點，佢好氣憤咁問，點解青島可以做到既現代化，又保留到被德國及日本人管治時嘅建築文化，但香港就做唔到呢？佢認為問題出於政府唔當文化旅遊係一回事。

其實諗落都啱，好似武打巨星李小龍故居，搞咗一輪先肯點頭幫手搞原址重建做紀念館，而孫中山紀念館又缺乏宣傳，都係不被政府重視之過。IT豪又話文化旅遊係大趨勢，如果香港唔好好把握呢個機會，做好啲本土文化保育，再遲啲就可能有危機嘞！佢提議煲呔曾政府要完善番香港嘅保育政策，仲話會再同旅遊界嘅立法會議員謝偉俊傾傾，睇吓會唔會喺立法會提出有關保育嘅質詢。睇嚟IT豪今次青島行已成功發掘到個新議題，睇嚟發展局局長林鄭月娥，同商務及經濟發展局局長劉吳惠蘭要好好諗定點拆彈先得嘞！