小白觀點：掟公仔麵肉丁仲好

從天而降嘅嘢乜都有，垃圾桶、菜刀應有盡有，日前有位女士好唔好彩，畀天降飛剪插正個頭，好彩佢大命咋。呢啲擲物狂使唔使咁慷慨呀又，下次有埋公仔麵、五香肉丁仲好，唔使房署出手，到時家庭主婦都爭住整番個網回收再用，一年可以慳番唔少o架。

近日曹操墓出土，發現咗一個懷疑一代梟雄嘅頭蓋骨，好多人都有興趣想知道骨頭上面有冇手術痕迹，證明華佗做過人類史上首次腦外科手術。不過小白老弟認為咁嘅推論太粗疏，有裂痕都唔代表係華醫生所為，邊個敢話三國當年冇高空擲物狂o架？話唔定掟「銘文石牌」有之，掟「挌虎大戟」又有之，曹操都中過招呀！

網友觀點...X）...

[　莫大毛　]

捉到呢班衰人，最好就係掟番佢哋落街……

[　匿　名　]

好恐怖……好彩唔係插落頭頂上……

[　大　丙　]

以後啲樓唔畀起咁高，最高都係三層好啦！

[　匿　名　]

丟鉸剪落街，隨時會插死人o架嘛，呢個人已經唔係無公德心嘅問題，而係冷血，蓄意謀殺！！

網址：www.sunsiupak.blogspot.com

阿豪觀點：依家做收買佬好爽

青衣長亨邨繼發生巨型垃圾桶掟落樓後，又有狂徒趁「拆禮物日」將七吋長鉸剪掟落樓，一名清潔課程女導師慘被插中後腦，佢忍痛拔出鉸剪，雖然好彩只係受輕傷，但係鮮血狂噴染紅兩包紙巾，真係好得人驚！

睇依家警方咁樣做嘢法，大家都係做好最壞打算，正所謂「天要下雨，娘要嫁人」，擲物狂要掟嘢落街，警方都係冇佢符個咯。大家戴定鋼盔出街係就係異相啲，但係命仔要緊呀。雜物橫飛，當然令到一般市民草木皆兵，不過對於收買佬嚟講，就真係最好嘅年代啦。依家唔使再辛辛苦苦搬嚟搬去，直接喺街度守株待兔，自然有鐵錘呀、雪櫃等送上門，都不知幾爽。

網友觀點...X）...

[　匿　名　]

淨係識丟垃圾落嚟，夠膽就丟啲錢落嚟，睇我哋驚唔驚……

[　無名火　]

應該請教吓明星點樣用鉸剪腳，對付那個扔鉸剪落街的人！！

[　快狠準　]

就算係掟錢，成袋硬幣掟落嚟嘅話，你都咪話唔死！

[　大　卜　]

香港人咁鍾意丟嘢落街，申辦下屆東亞運，新加「丟嘢落街」項目，衝擊金牌。

網址：www.lukchiho.blogspot.com