講開呢條武廣高鐵就巴閉咯，鐵路全長一千零六十九公里，將廣東廣州、湖南長沙同湖北武漢三個省會連成一線，採用中國自行開發生產嘅「和諧號」列車，平均時速高達三百五十公里，快過晒法國同日本嘅高速鐵路，全球稱冠。武廣高鐵通車，標誌中國步入高速鐵路嘅新時代，到二○一二年，全國將會建成十一萬公里鐵路網絡，其中以「四縱四橫」為骨幹嘅高速鐵路長達一萬三千公里。

內地積極興建高鐵網絡，呢項大計亦預埋香港一份，只要廣深港高鐵香港段落成，到時由香港到北京唔使八個鐘。可惜啊，因為港府做嘢拖泥帶水，高鐵香港段至今仍無影無蹤，搞到中國鐵道部發言人都忍唔住出聲，話高鐵建成後對香港經濟發展同旅遊業好有幫助，希望香港社會停止爭拗，畀高鐵工程盡快上馬。

其實，心急嘅又點止鐵道部呀，早前有專家指出，內地興建高鐵如火如荼，如果香港再唔快啲融入網絡，必然成為孤島。開講有話，執輸行頭慘過敗家，而港府就次次都扮演敗家仔角色，早喺二○○○年，當局已經提出興建高鐵大計，但係後來左拖右拖，拖到今時今日，工程造價竟然由當初預算嘅一百七十億元升到近七百億元，成為全球最貴嘅高鐵，唔怪得引起咁多爭拗啦。

政府無能，政客就乘機踩多一腳。日前立法會財委會討論高鐵香港段嘅工程撥款，部分泛民議員為咗催谷元旦遊行人數，為所謂嘅「五區總辭」造勢，喺會上大玩「拉布」戰術，搞到撥款申請被迫拖到明年一月再議。叮！興建高鐵本來只係一個經濟民生議題，但係啲政客就夾硬將佢政治化，一味拖慢發展步伐，根本就係損人不利己。

講到尾，搞搞震就係無良政客嘅本性，再咁搞落去，香港唔止成為一個孤島，仲隨時成為一個沉島添，叮！