有千億新抱之稱嘅徐子淇（Cathy）生完次女晞兒之後，已經極速收身，早前佢出席個酒會，講起最愛嘅食肆時，Cathy稱讚國金商場本月初啱啱試業嘅法國餐廳The French Window。餐廳主廚Mickael Le Calvez仲話，Cathy一個禮拜幫襯三次咁多添！
Cathy話，The French Window唔似一般法國餐廳咁拘謹，佢最鍾意嘅前菜係「香煎玉米餅配鮮黑菌」，甜品係「焗杏仁香梨．朱古力雪葩」。至於主菜，間餐廳最拿手嘅係牛肉，但Cathy唔食牛，所以廚師Mickael特別為佢炮製一道以法國小鎮Mieral特色烹調嘅雞肉，再佐以黑松露菌同配菜，色香味俱全。
點解Cathy戒食牛肉﹖原來一、兩年前大女晞彤唔小心整親，靚媽心急之下祈求上天保佑，聽人講戒食牛肉可令心願靈驗，所以就戒咗牛肉嘞。除咗西餐外，Cathy都會去國金軒、龍景軒醫肚，唔講唔知，呢三間都係佢老公李家誠（Martin）打理嘅美麗華集團旗下食肆，難怪佢咁鍾意啦！