青年人經常因言行偏激被冠以反叛、狂野等代名詞，社會亦會以麻煩嚟形容呢類青年人，不過，身兼大學教授嘅中策集團主席馬時亨就話：「年輕人應該趁後生有限度去玩吓同任性吓。」佢話，青年嘅反叛行為係源於心中有團火，仲直認自己都曾經年少輕狂，不過一提到「一夜情」三個字，肥亨即嚇一跳：「我個年代絕對冇呢啲嘢，諗都唔敢諗，亦都唔敢講。」
肥亨主持嘅電台節目尋日播出最後一集，佢都趁大結局搞搞新意思，同一班參加過節目嘅年輕人食聖誕大餐兼自爆狂野歲月。肥亨話，佢小學時鍾意同同學打交；中學會考放榜前一日，更約理成班同學去水塘燒嘢食、玩通頂；入咗港大，佢一樣咁反叛，試過抗議日本侵佔釣魚島，仲同一班同學抗議巴士公司落實「不設找贖」計劃。
佢話有時後生仔嘅言行大人難以接受，但青年人卻覺得理直氣壯，到長大先有另一番睇法。講到挫折，佢又呼籲年輕人要珍惜生命，「人生不如意事十常八九」，仲寄厚望予年輕人：「香港經濟神話要靠年輕人去延續！」