品茗係好多城中名人嘅愛好，全國政協常委、建仔監委會主席楊孫西酷愛茶葉，幾年前仲喺福建武夷山投資咗一間香江茶業，佢旗下嘅公司都有參加正喺維園舉行嘅工展會，記得早前楊孫西招呼一班建制派議員去佢清水灣超級豪宅食飯，散場時更以茶葉為禮，二十幾位議員每人獲贈一罐特級大紅袍。
呢隻茶葉有幾矜貴？據說佢哋全部係楊孫西嘅私人珍藏，由佢間武夷山茶廠運到，可以話係有錢都買唔到嘅貨，所以冇人知定價。不過，喺楊孫西位於工展會嘅攤位裏邊，都有產自武夷山嘅大紅袍，店內最貴嘅野生品種，二両裝盛惠四千八百蚊，人工培植而不含雜質品種，二両裝都賣成一千八百蚊。不過，楊孫西送禮都係一番心意啫，唔係金錢可以衡量嘅！
工展會開幕以嚟，廠商會高層不時拉隊掃貨做宣傳，早兩日楊孫西都有落去，但佢半步都冇涉足自己嘅茶葉檔口，費事招人話柄。