行政會議成員查史美倫（Laura）喺中港兩地證監會服務咗十幾年，仲獲得一個「查死你們」嘅「雅號」，佢日前接受一個電視節目訪問時，透露有一年返內地做證監會副主席，下屬對佢呢位空降新上司或多或少有啲抗拒，結果佢上任三個月後，就有呢個花名。
佢話，「查死你們」係「查史美倫」嘅普通話諧音，當然都同佢喺監管機構嘅工作不謀而合啦。講起呢段往事，Laura都不禁莞爾，仲話自己素來低調，呢啲都係性格使然，事關佢鍾意多做少說。
喺財經界打滾多年，依家係港交所獨立非執董嘅Laura，每逢港交所換主席嘅時候，總會傳出佢嘅大名，Laura話：「唔係呀，唔會啦！」斷然否認接任港交所主席嘅可能性。佢仲話，一來唔到佢話事，二來佢鍾意試新嘢，好似○七年做大學教育資助委員會主席，都係一種新嘗試。
最後佢話想留番多啲時間畀家人，尤其是佢個孫。講起個孫，Laura笑得特別開心，話佢會同老公查懋成爭個孫。兩個爭住抱BB，認真係有孫萬事足！