警方尋晚九點鐘喺中環皇后大道中擺路障，截停車輛並隨機要求司機進行初步酒精測試，Eva喺現場停留咗半個鐘，睇吓警員執法程序，並聆聽在場警員嘅介紹。據佢同前線警員傾偈攞料顯示，年過三十歲嘅駕駛者一般安全意識較高，有飲酒嘅話一般都會搭的士，但後生仔嘅危機意識就差啲，飲酒後揸車嘅比例較高，所以Eva都覺得，長遠必須加強年輕司機嘅教育同宣傳至得。

恐難歡度聖誕假

運輸及房屋局都決定，半年內會提交修例草案畀立法會，除咗加強危險駕駛嘅刑罰外，仲會破天荒引入「加重刑罰因素」，建議酒後駕駛列為加刑因素，即係話，駕駛人如酒後駕駛被控危險駕駛罪行，就可能面對雙重刑罰。

聖誕假期好多官員都離開香港度假歎世界，Eva就好頭痕。因為高鐵撥款被泛民拉布延誤後，要押後到一月八號再表決，事件除令高鐵工程大失預算外，佢都要喺假期中盡最後努力；日前又發生醉駕事故奪走好教師嘅悲劇，暴露咗政府打擊醉駕嘅立法進度脫離民意，Eva都要喺聖誕日企喺街頭宣傳打擊醉駕。

呢個聖誕咁多火頭，Eva睇怕都好難有時間及心情同屋企人歡度聖誕囉！