有民間組織接到投訴，話有旅遊會籍公司以不良手法屈市民入會，初步估計，最少有二百幾人中招，涉案金額多達六百幾萬元。呢啲旅遊會籍公司先以調查公司嘅名義做問卷調查，呃事主講出個人資料之後，然後再打電話畀事主：「恭喜，你中咗獎，某日某時請上嚟我哋公司攞獎品啦。」

當事主開開心心上到嗰間公司，惡運就開始嘞。呢，有位受害者去領獎，先要聽四十五分鐘講座，然後由職員用幾粒鐘游說佢買度假屋會籍，話可以喺十二個國家享用度假屋咁話，經過疲勞轟炸之後，受害者用信用卡交咗三萬幾元首期，以後月供五千元。不過返屋企睇清楚合約，先至知道大鑊，原來要供滿十一萬元先可以享用度假屋，到時仲唔一定安排得到㗎。而即使未能享用度假屋，每年亦要交將近三千元管理費，最弊嘅係，你想終止會籍都唔得。

咁都得？咁即係明屈啫。其實，萬變不離其宗，呢種不良促銷手法已經唔係乜嘢新招，但仲係不斷有人中招，證明香港消費陷阱處處，令人防不勝防。所以太一叮要提醒消費者，千祈唔好貪小便宜，最緊要記住，世界上唔會有咁大隻蛤乸隨街跳嘅。

話時話，香港好似變咗老千竇，早幾日先至有資訊公司被指濫發收費短訊呃錢，又有奸商以不良手法推銷電視機頂盒，依家又爆出旅遊會籍公司踢人入會。真係鑊鑊新鮮鑊鑊甘。最弊係港府袖手旁觀，就算有受害者投訴，甚至報警求助，當局都懶懶閒，唔怪得不良商戶有恃無恐，愈嚟愈猖狂喇。

其實，要對付呢啲不良促銷手法，有幾難啫。法官都話喇，政府應該立法監管度假屋會籍公司嘅推銷手法，保障消費者利益。再講喇，就算一時未能立法，當局亦可以用放蛇等方式打擊騙徒嘅啫。

所以話，香港遍布消費陷阱，消費者步步驚心，港府必須負起好大責任，事實證明，打擊不良促銷手法，當局非不能也，實不為也。

叮佢個鎯鎯，如果再咁落去，邊度仲有購物天堂呀，係消費地獄就真！