中華廠商聯合會尋日喺工展會場內舉辦「世博同樂日」，喺年底落莊嘅會長尹德勝預告話上海世博會將別開生面，廠商會都有份擺展覽，屆時佢雖然唔再係會長，但仍會拉隊北上撐場。
卸任在即，尹會長仍然緊張工展會檔生意，尋日靜雞雞巡場視察銷情，期間撞到其中一名工展小姐候選人，佢主動上前打氣，但笑謂冇偏幫任何人，叫我哋咪心邪。展望今年工展會生意額，尹會長話有信心拍得住去年，亦帶頭喺麵食同餅乾攤檔掃貨，唔少攤位老闆見會長大駕光臨，主動送多幾份贈品例如即食麵同餅乾畀佢，當係賀佢榮休。
中旅社都有喺工展會擺檔推銷上海世博會，又即場賣入場券。中旅發言人話，喺香港已賣出三萬張門券，以團體票為主，銷情幾理想，預料元旦後賣票情況會進入另一高潮。