撼「扮嘢陳」劇力萬鈞

白姐姐批評黃毓民喺議會內爆粗掟蕉，不但教壞細路，甚至懷疑嗰啲喺旺角鬧市空降鏹水彈嘅變態狂徒，多少都有受到佢嘅偏激言行影響。佢又話自己一向都好支持民主，不滿政府提出嘅政改方案，但認為泛民最緊要係守住喺立法會嘅政改否決權，唔係郁啲就賭鋪勁玩辭職，輸光輸淨後又再向選民借過，簡直係欺騙公眾兼浪費公帑。

港島區嘅選情估計仲亂過九龍西，除咗之前聲言會辭職參選嘅「金勞詹」詹培忠，有人仲提過可以由海洋公園主席兼蘭桂坊之父「扮嘢文」盛智文出選，貪佢形象中產同建制派色彩較淡，可以將競選議題由政改公投，轉移為講整體經濟同旅遊飲食業發展，打亂公文袋陳淑莊想借今次補選，力谷自己做「民主女神接班人」嘅大計。

除此之外，扮嘢文亦好擅長搞Gag，對住兼職戲子陳淑莊真係對晒嘴，呢場「扮嘢文對扮嘢陳」大戰如果真係搞得成，劇力同戲軌絕對唔比白姐姐惡鬥黃毓民輸蝕！