經濟動力嘅立法會議員「蘇菲」梁劉柔芬細仔梁麒繕上個禮拜大婚，三個仔女已經全部成家立室，佢成個人鬆晒，話可以放下心頭大石。前幾日喺東亞運動會香港足球隊祝捷酒會度，見到佢嚟捧足總主席老公梁孔德場，佢講到仔女離巢後嘅心情，開心到眉飛色舞。
蘇菲話飲咗杯新抱茶後，到依家都甜在心頭，而一對新人擺完酒之後去咗澳洲度蜜月，囝囝仲send咗個「I Love You, Mum」嘅短訊畀佢，睇到佢甜到漏！
聖誕點過呀？佢話唔會出埠嘞，原來志蓮淨苑呢幾日舉行一連幾日嘅盛大水陸法會，話晒佢係志蓮淨苑嘅開國功臣之一，當然要留港幫手啦！
