好多喺外國讀書嘅名人仔女都會喺暑假同聖誕假期返港同家人共敍天倫，立法會會計界議員「波波」陳茂波個仔陳天行都由英國返港同家人歡度聖誕節同新年。波波話原本一家人諗住去泰國玩幾日，但波仔一月頭就要趕返英國考試，為免太頻撲，只好留港過聖誕，亦好讓波仔多啲時間同爺爺聚吓。
聖誕節一家大細最好就係去食聖誕大餐，但波波反而唔想同人逼，寧願買啲靚牛扒返屋企開大餐，除咗無拘無束外，荷包都慳番唔少，啱晒波波咁節儉。講到慳家，原來波仔仲慳家，舊年入讀英國牛津大學修讀法律，話咁快就一年，聽聞個書包已用到好殘舊，但都唔捨得買新書包。
波波唔忍心見到波仔個書包咁殘舊，於是送個有型嘅斜孭袋書包畀波仔做聖誕禮物，佢話斜孭款式啱晒時下年輕人喎。