早兩日撞到陳南祿，佢話早就為太太預備咗一份特別嘅聖誕禮物。咁係乜？唔係啲乜嘢貴重嘅金銀珠寶，而係一張收據。

竟然係收據，唔通老婆買嘢，老公埋單？非也！其實係一張慈善機構發出嘅捐款收據。原來近幾年嘅聖誕節，佢都會捐錢畀慈善機構，再用捐款收據做聖誕禮物，因為佢覺得咁樣比起買嘢更加有意義，既可以幫到有需要嘅人，幫到人自己又開心，每個人都可以喺呢個普天同慶嘅日子高高興興，一舉兩得！咁又係嘅，做善事幫到咁多人係開心啲嘅，總好過大吃大喝一餐，消化完就乜都冇嘞！

其實，陳南祿早喺國泰掌舵時已經鍾意做善事，以前曾經幫手撮合國泰同慈善機構合作，將國泰飛機上用舊咗嘅飛機氈收集好，分批送畀佢哋，再分發畀有需要嘅露宿者，實行減少浪費、物盡其用。