話就話暫時擱置啫，但委員會仍死心不息，前排又再諮詢包括主席同副主席在內合共十六個委員嘅意見，當中有五個委員話乜外訪都唔去，其中一個係會參加五區總辭嘅社民連議員「大舊」陳偉業。

呢次諮詢除咗原定嘅美加行之外，仲多咗個選擇，就係喺原定諗住出年二月去美加嗰段時間轉去悉尼同新加坡，但只係得四個話去。咁同期去美加呢？亦都只有四個。再問若果美加行押後至七月呢？話會參加嘅有七個。

報定下年團太有信心

眾所周知，社民連同公文袋計劃一月辭職，希望趕及喺六月份重返立法會，而呢個美加團預計喺七月成行，以大舊嘅反應，似乎都預計自己選情危危乎；但話會參加美加團嘅竟然仲有會參加總辭嘅公文袋袋巾傑同陳淑莊，唔通佢哋真係咁有信心可以補選成功？

可能因為工聯會票后陳婉嫻早前拒絕出戰九龍東，所以袋巾傑先咁鬆毛鬆翼，但建制派內部評估就算嫻姐唔出山，派第二梯隊嘅人出戰，攞嘅票最多少三千，但袋巾傑冇白鴿黨站台拉票，選情就凍過水嘞！再講吖，陳淑莊喺港島區畀建制派同金勞詹嘅夾擊下，佢都未必真係咁穩㗎！

雖然立法會秘書處大多喺出年七月外訪團成行前至會訂機票同酒店，但要喺事前聯絡好晒美加嗰邊嘅接待團體，若果袋巾傑同陳淑莊返到立法會當然冇問題啦，若果佢哋選輸咗，想飛都要撻番落嚟啦！若果再有人甩底嘅話，到時美加方面仲大棚人接待嗰小貓三四隻，真係失禮死人喇！