小白觀點：K禍已蔓延各行各業

日前有個的士司機揸住架車喺公路上舞龍咁舞，好鬼牙煙，差啲搞到發生交通意外，後尾警察發現佢成嘴成鼻都係粉，到底嗰啲係乜嘢粉呢？按常理推測，冇理由有人帶包麵粉開工，百無聊賴隊個鼻去索兩嘢o架！假如麵粉咁使得又唔錯呀，以目前嘅科技，唔理係驗頭髮抑或係驗尿，相信一定驗唔出有人索過麵粉，以後學生哥可以任索唔嬲。

話時話，近年當局一味只係識得標籤校園索K氾濫，講到好似凡中學生都係索K一族，查實K禍已經蔓延到各行各業，唔好話我話，如果有朝一日爆出有乜乜專員用公帑索K，又或者爆出有大蛇坐水警輪去荒島開餐，大家千祈唔好大驚小怪喎。

網友觀點......

sheep_sheep

可能係洗衣粉呢！呵呵！

bear熊

離晒譜！揸車索K，自己想死好啦，唔好累街坊！

Paul少

拉佢坐監就好喇，差啲搞到大車禍，佢都唔知驚o架！

Shirley

連的士佬都咁冇職業操守，以後搭的士要驗吓司機口鼻有冇粉至上車，好牙煙！

網址：www.sunsiupak.blogspot.com

阿豪觀點：「乾淨司機」應獲嘉許狀

有的士司機懷疑索完K，不勝藥力，竟然將架車就咁停喺高速公路中心，險象環生。據報道司機畀到場調查嘅警察叫醒時，神志迷糊，嘴角仲有白色粉末添。嘩，睇嚟校園自願驗毒計劃有必要擴展至運輸界喎……

講真，的士司機自願驗毒計劃，邏輯上肯定比校園自願驗毒計劃強好多。學生哥如果有索K嘅話，唔通自己會唔知？仲使去驗尿咩！梗係你對佢有懷疑至要驗o架嘛，而有心求助嘅學生自己會識搵社工o架啦！

的士司機驗毒計劃就唔同嘞，運輸署宣布向冇索K嘅「乾淨司機」發一張嘉許狀，的士司機可以貼喺車身當做招徠，咁樣佢哋咪有原動力走去驗毒囉！

網友觀點.....

bbcs

聖誕節大家唔好take完嘢、飲到high晒咁揸車就已經好感謝主喇！

廖尚恆

呢單迷幻的士已經算好彩，你睇吓醉駕撞死好老師嗰單至講啦！

卜乖

全城動，全城驗毒行動。唔少司機為方便，喺車入面用膠樽小便，警方順便拎嚟驗毒咪得囉。

威利

呢啲司機，真係要掛番個K牌至得……

網址：www.lukchiho.blogspot.com