唔怪得旅發局將玉器市場列為重點推介嘅旅遊景點同購物區，話時話，呢個景點確實幾有特色，好值得向旅客推介。可惜嘅係，玉器市場門口最近變咗露宿天堂，唔止搞到亂七八糟，仲臭氣熏天，乜嘢旅客都趕走晒啦。

呢，玉器市場租戶反映，有兩個露宿者瞓正喺門口，搞到嗰度臭烘烘，老鼠、曱甴四圍跑。旅客見到咁嘅環境，走都走唔切啦，邊度仲有心機買玉器呀。

咁都得，政府唔理㗎？唉，唔提政府仲冇咁嬲，一提就把幾火，佢哋最叻係欺善怕惡，正如有市民話齋，食環署班工作人員平時見阿婆跌張紙落地下，都六七個人圍上去，但一見到聲大夾惡嘅露宿者，就變咗縮頭烏龜。

警方亦唔叻得幾多，佢哋九月就接到投訴，同社署進行咗五次聯合行動，但始終搞唔掂兩個露宿者。後嚟本報介入查詢，食環署、警方同社署先採取清洗行動，將佢哋趕走。

其實，油麻地玉器市場只係露宿者集中地之一咋，平時無論喺銅鑼灣定係中環，都會見到露宿者瞓喺街邊，用紙箱、膠袋同報紙霸佔路面，有啲露宿者仲向途人乞錢乞食，途人都要兜路走。

叮，香港假假地都係國際都會，係外國人心目中嘅購物天堂，家陣通街都係露宿者，購物天堂變咗露宿天堂，真係失禮死人。正如立法會議員話齋，咁搞法一定會成為另類景觀，嚇走旅客，打擊香港形象。

近年香港經濟不振，露宿者愈來愈多，淨係社署登記嘅就有四百幾人，而社工團體估計全港最少有八百幾個露宿者，而且仲有年輕化嘅趨勢。遍地都係露宿者，唔單止損害香港形象，仲分分鐘影響治安及社會穩定，須知當一個人走投無路，乜嘢事都做得出，當局實在唔可以掉以輕心。

奇就奇在，政府好似事不關己咁，近年話就話設立咗幾個露宿者之家，但宿位經常不足，加上管理不善，有啲宿位被人長期佔用，有啲仲變咗道友之家，真正有需要嘅人反而冇機會入住，惟有繼續瞓街。

其實，有頭髮邊個肯做瘌痢吖，好似呢幾日天寒地凍，你估露宿嘅滋味好受咩，政府唔通要見到「路有凍死骨」，先至肯做嘢？叮！