政府訂購咗三百萬劑豬流感疫苗，嚟緊個禮拜一開始就會全面注射，外國注射疫苗爆出唔少意外，香港人都好緊張，擔心打針有混亂或疫苗導致過敏反應甚至更嚴重事故等，周一鑊早兩日仲高調話會密切注視疫苗注射嘅運作，以為佢會眼甘甘睇實啦，點知憲報尋日就踢爆佢做騷，下禮拜一起，佢會放假十五日，假期橫跨聖誕、新年，將香港市民打豬流針嘅問題，卸咗畀副局長梁卓偉睇囉。

除咗佢之外，呢個聖誕假期仲有最少六個問責司局長放假，大部分都喺聖誕黃金檔期放，政務司司長唐唐由二十三號放到二十九號，教育局局長孫明揚焗住頂更，惟有喺大前日（十六號）攞咗日假放，之後就要全力鎮守香港。

聖誕新年政府半真空

呢輪開始預算案諮詢工作嘅鬍鬚曾，亦由二十一號起放假四日；自從泰國包機事件之後就患上離港恐懼症嘅保安局局長李少光請咗副局長後，今個聖誕亦由平安夜當日放假放到二十七號，有副手睇檔，睇怕佢呢個假期都心定啲；其他問責官員如德成局長、劉吳惠蘭都會抖一抖，政制及內地事務局局長林瑞麟就仲未攞假，佢話仍然十五十六。

呢批官員佔咗三司十二局一半以上，可以話呢個聖誕、新年，特區政府大部分時間都係處於半真空狀態，大家都係自求多福好啲喇！