嗱嗱嗱，瑪麗醫院又搞出人命嘞。有位患心臟動脈瘤嘅女病人，原本安排月初接受醫院首次引入嘅人工支架微創手術，點知因為護士集體請假要延後一個禮拜至做，更懷疑手術因為由臨時頂更嘅護士協助，要做多一倍時間而出事，因手術後遺症，一日之後不治。

話時話，心臟手術最緊要做得及時。好似俗稱「通波仔」嘅心導管手術咁，如果錯過所謂「黃金六小時」，可能連神仙都難打救。至弊公立醫院資源分配嚴重失衡，手術排期閒閒地要一年半載。最攞命就係，醫院唔單止你急佢唔急，仲玩埋「親疏有別」添。

手術本來人人平等，但邊個病人做先，竟然有貴賤之分。嗱，前幾個月，財政司司長曾俊華突然心臟病發送咗去瑪麗醫院，第一時間就做通波仔手術，唔止冇錯過「黃金六小時」，住咗六日就龍精虎猛出院過中秋。

呢啲咪叫超一流服務囉。不過咁，同人就唔同命，如果冇錢冇勢，對唔住，慢慢等啦。六個鐘？諗都唔使諗。六日？一樣唔得，六個月都未必有機。等唔切？咁就關人個關咯。

呢嗱，有位梁生今年八月底感覺不適送入屯門醫院，醫生睇過之後話係心臟病發，而且情況嚴重，要通波仔。既然要做手術，梗係事不宜遲啦，點知醫院話排期要排到明年六月喎。

結果梁生住咗一個禮拜就要出院，醫院話病情已經好轉，但唔夠十個鐘又再發病，要送番醫院搶救，但病情唔穩定，冇辦法即時做手術，第二日不幸死亡。梁生由出院到過身唔夠十五個鐘，但院方既冇詳細交代事件，亦冇將個案交死因庭跟進。梁太質疑：「點解逼佢出院？又唔同佢做手術？唔通小市民無錢、無權、無勢，條命就特別賤？」

呢個問題，最好由食衞局局長周一嶽嚟答。喺佢轄下，公立醫院視普通市民如草芥，漠視病人權益嘅醜聞，數都數唔晒。醫療事故無日無之唔在講，普通市民喺正明愛醫院門口心臟病發，一樣冇人理，七搞八搞至Call到架白車嚟，人已經救唔番。如果暈低嗰個係港府高官，睇怕唔使幾分鐘就已經送入手術室，有專人服侍啦。

同樣係心臟病發，同樣送入公立醫院，鬍鬚曾即刻可以通波仔，依家仲愈來愈風騷添；梁生就要等十個月至有得做手術，而且行都行唔郁就要出院，卒之等唔到就枉死。正如有元朗區區議員話齋，當局咁做明顯係將市民分等級、分貴賤。

叮佢個鎯鎯！政府醫療撥款愈來愈多，使喺病人身上嘅錢愈來愈少，睇病輪候時間愈來愈長，依家仲搞埋官貴民賤嗰套添。係咁，公立醫院不如索性改埋名做「官用私家診所」罷啦！