小白觀點：包裝愈精美愈要小心

以前有句話叫「製藥無人見，存心有天知」，好多藥廠都奉之為金科玉律，但日前有病人組織做過調查，發現兩成病人曾經買過假藥，呢個數字都咪話唔得人驚！問題係，其餘嗰八成人都唔好高興住，事關佢哋都唔一定買到真藥。

道理好簡單，第一，真藥未必醫得好人，假藥亦唔一定食得死人，所以單憑食咗落肚自我感覺良好就認定係真藥，未免太過武斷。第二，成藥包裝印刷得精美又有埋雷射嘜頭亦唔保證係真嘢，手袋都有分A貨同超A貨啦，印得愈靚反而要更小心呀，因為假藥商人為咗拉上補下，將價就藥，話唔定令閣下藥到病除嘅，係一百個民工搓出嚟嘅老泥丸嚟㗎！

網友觀點......

Mic

邊間藥廠賣假藥咁冇良心，摷出嚟封佢舖啦！

Vickie

依家乜都有假嘢，為咗錢冇晒人性，到底咩世界呀？

堯明

政府要做嘢啦，嚴謹監察假藥廠啦！拉晒佢哋！

happyhappy

嘩，分分鐘疫苗都有假㗎喎，打咗咪死？

網址：www.sunsiupak.blogspot.com

阿豪觀點：當為科學研究做犧牲

周一嶽早排出嚟宣布，話政府撥四塊地出嚟搞私家醫院，話可以改善醫療服務質素喎……計我話，市民唔食錯藥已經執番身彩啦，仲話高質素服務？呢嗱，有病人組織做過調查，發現兩成病人曾經買過假藥，醫療產業化？唔……

藥物用嚟醫病，人命關天㗎嘛，政府居然懶懶閒冇監管，搞到假藥問題愈嚟愈嚴重，依家又話去搞醫療產業化，真係未學行先學走。

不過諗深一層，正所謂「真作假時假亦真」，新藥測試都係分開兩組人，一組病人用新藥，另一組就以其他藥物代替，用嚟確定新藥功效唔係心理作用。所以話，食到假藥嘅市民，咪當自己為科學做少少犧牲囉。

網友觀點......

匿名

點解起私家醫院，而唔係公立醫院？

尖子

咁街邊嗰啲寶藥黨咪有好大發展空間？

伯南克

咁危險，煲呔曾仲叫人生三個？

sophiamok

兩成人買過假藥？咁多？喺香港定大陸先？

網址：www.lukchiho.blogspot.com