尋日係立法會議員「蘇菲」梁劉柔芬嘅細仔梁麒繕同女友黎美儀結婚嘅大喜日子，政商界猛人車輪轉出席晚宴撐場。蘇菲同梁孔德兩公婆笑到見牙唔見眼，梁孔德更大搞棟篤笑，聲言細仔婚宴後，屋企盛事告一段落，除非蘇菲批准佢喺外邊搵多個喎！
嚟到賀嘅商界人士包括新世界發展主席鄭裕彤、長實集團副主席李澤鉅、合和實業主席胡應湘夫婦、英皇集團主席楊受成等。
身為足總主席嘅梁孔德話，今年有兩件開心事，第一件係香港足球代表隊勇奪東亞運金牌，對自己嚟講係份好大嘅賀禮；第二件更開心嘅事就係連細仔都成家立室嘞。睇嚟佢兩公婆真係安樂晒喎！