本文重點
工聯會嘅立法會議員葉偉明上個禮拜三喺立法會開開吓會，無喇喇走出嚟向記者大鬧臨時最低工資委員會，話委員會事前連電話都冇個，就突然發信叫工聯會喺呢個月二十四號平安夜朝早向佢哋表達意見，而會面時間只有四十五分鐘，令人質疑今次諮詢根本全無誠意，「相見等於不見」！
亂發炮鬧埋自己人
但佢好似唔記得咗工聯會嘅前立法會議員鄺志堅都係臨資會成員，如果佢有乜意見，大可私下撥個輪直接向鄺大狀投訴，唔使透過傳媒公開發炮，變相鬧埋自己人。再者，臨資會為平衡勞資雙方利益同廣納意見，一見就要見晒全港各大小勞工同工商團體，計埋冇一百都有幾十個，工聯會分到四十五分鐘已算相當畀面，葉偉明咁樣講法，令臨資會以後好難做嘢。
據聞鄺大狀睇到有關報道後都有啲不滿，專程搵咗葉偉明講解臨資會嘅做法。最有趣嘅係，立法會前晚辯論有關公營機構管治嘅動議時，葉偉明花咗好多篇幅講番生產力促進局被控無理解僱工會成員單官司，不點名大讚喺事件中協助被裁員工嘅鄺大狀，曲線向對方沙冧，咁都係想鄺大狀下一下火，唔好咁㷫啫！
講到尾，葉偉明係政壇同立法會一名新丁，仲未把握到鬧人嘅準則同尺度，相信鄺大狀都唔會記喺心嘅。