香港青年聯會前晚喺會展搞咗個「聖誕白雪飄飄夜2009」，成班名人二代玩到興高采烈，副主席朱鼎健仲嫌唔夠hot，隔空做聖誕老人捐六萬八畀由青聯女將組成嘅賢慧社，等受助嘅小朋友去海洋公園玩番日。
至於李文彬就成晚陪住太太Amanda出入，原來李太有身己，仲要嚟個孖胎好事成雙，真係恭喜恭喜！第一次做爸爸嘅文彬話知道太太有喜後，不停送禮物畀太太，嚟緊仲要繼續送上驚喜。
場內見到張新面孔，佢就係英皇集團主席楊受成孻仔Alex楊政龍，今年二十三歲嘅Alex喺美國讀咗八年書，啱啱返港五個月，依家喺家族嘅英皇集團做企業行政官，雖然佢有啲怕醜，但對答頭頭是道，仲要兩文三語都好流利。
早前Alex去咗北京參加國情研習班，佢話全程用普通話都沒問題；問佢喺邊度學普通話，佢好謙咁話要多謝佢當年喺美國有個台灣同房，至練出咁流利嘅普通話。睇嚟青聯有咁好嘅新血加入，真係如虎添翼！