喺公文袋十九名執委當中，最初對總辭嘅正反意見各佔一半，但以淫賤黎為首嘅「搞事四人幫」搞咗個「密室飯局」後冇耐，激進派喺九月初嘅集思會上發動「突擊」，喺未經黨內諮詢以及同其他泛民黨派協商之下，強行通過仲激啲嘅「雙辭方案」，即晚仲緊急舉行記者會向外界公開計劃，務求令反對者冇得翻案。
黨內嘅保守派最初仲質疑激進派喺冇法定地位嘅集思會上通過咁重大嘅決議，明顯係違反黨章同程序公義，要求好似白鴿黨咁召開特別會員大會重新表決，但激進派只肯喺本月初周年會員大會嘅「其他事項」議程上討論。
其後白鴿黨利用元老司徒華發火力抗「四人幫」施壓，表明唔會參與總辭，一度令部分支持總辭嘅公文袋黨員腳軟，但激進派仍拒絕「收油」，最終拉到八成票數力撐總辭，總之要將成個執委會抬上虎背，邊個想褪軚就係衰仔。
最搞笑嘅係公文袋若想喺補選中贏番兩席，點計都應派出吸票能力最高嘅黨魁余若薇出戰港島區，但原來黨章講明黨魁必須係直選議員，余若薇同疑似候任黨魁袋巾傑一旦辭職，按資歷就應將黨魁交畀反對總辭嘅湯家驊。激進派喺無計可施下，最後只好改派立會新丁陳淑莊，令勝選機會大打折扣。
事件嘅底因就係公文袋內嘅激進派為咗強推總辭，運用各種手法打壓黨內嘅反對總辭聲音，於是一步一步走上呢條集體「跳樓」嘅不歸路。