由一班前CPU非全職顧問組成嘅新智庫群策學社尋日正式出爐，仲請嚟現任CPU首席顧問劉兆佳做榮譽贊助人，差啲未打正旗號同CPU打對台。群策學社主要喺環保、教育同經濟等方面畀意見，唔少成員都話，以前喺CPU討論完出嚟嘅結果都唔知有冇被政府採納，依家做智庫成員，將喺腦裏面諗到嘅建議正式擺上枱嚟畀人參考，點都好過成班人坐喺房度高大空長吹水！

倡喺東涌搞「杜鵑節」

講到咁白，即係話依家佢哋要浮出水面，有意見就喺外邊嗌，一來可以爭取曝光，二來變身做壓力團體，逼政府做嘢。

群策學社一成立就有搞作，身兼學社主席嘅中華總商會副理事長方文雄話已向政府提咗個建議，將香港打造成好似日本咁嘅賞花勝地，用一億喺東涌四個地方種五百萬棵杜鵑花，希望七彩繽紛嘅杜鵑花可以為香港吸引多啲遊客，仲可以為東涌創造多啲就業機會，就連發展局局長林鄭月娥聽完之後都話可以考慮添！

身兼副主席嘅城大副校長何炘基就話，如果成件事發展順利，相信最快二○一三年香港就可以舉辦第一屆「杜鵑節」，到時料為香港帶嚟三億幾嘅收入。

方文雄仲批評依家政府冇統一嘅樹木政策，有時喺同一條路，可能有五棵唔同嘅樹，而且開出嚟嘅花一啲都唔美觀；仲話如果政府肯行多一步，出到嚟嘅效果實好好多！

聽到未？一開波就鬧政府喇，但呢個頭炮又唔係好到肉喎。老實講，被委入CPU嘅人都係政府信得過嘅，呢班前顧問當然唔例外，但「杜鵑」最後會唔會又變成煲呔曾專用、本來叫香港市花「紫荊」嘅智經研究中心咁，成為半官方嘅發言機器？就要放長雙眼睇真啲嘞！