有個十七歲新移民哥哥仔，嚟香港幾年都冇乜朋友，舊年五月突然收到個話可以免費註冊加入交友網站嘅手機短訊，唔知有景轟登記咗，之後不斷收到短訊，佢又不斷回覆。後來畀電訊商停機，至發現原來收發呢啲訊息每次要收五蚊，加埋足足要畀成萬六蚊服務費，無辜欠債不特止，仲畀阿媽鬧到幾乎要自尋短見。

免費變破費，登記變確認，畀人任掠唔嬲，就算想取消服務都搵唔到呢啲「隱形」資訊公司，焗住繼續畀錢，無良奸商無王管，仲成世界嘅？

叮！講開政府監管，真係火都嚟埋。查實問題早就存在，消委會舊年全年收到呢類流動數據服務投訴超過六百宗，今年頭十一個月已經有四百七十宗。有立法會議員多次向有關部門反映，但當局就話希望以行內自律形式嚟規管。

家陣問題曝光，市民狂炳港府冇監冇管，當局至出嚟敷衍吓。電訊管理局尋日拿拿臨召集電訊網絡商閂埋門開會，「商討資訊公司向手機用戶濫發短訊及收費問題」。蠱惑短訊氾濫成災至「商討」對策，遲唔遲啲呀？

商務及經濟發展局局長劉吳惠蘭仲搞笑，佢除咗話「不能容忍」，要求電訊商提供清楚同簡易方法畀消費者終止服務外，又話電訊商有責任，亦有技術做到有關安排喎。

叮！既然已經知道技術上可以令消費者免被誤導，而且呢啲不良手法出現已經唔係一日兩日，起碼一年兩年，中招嘅市民更加唔止一百兩百，港府點解發晒雞盲，一忍再忍，到依家至出聲？

更加離譜嘅係，電訊管理局居然話，冇權力監察供應內容嘅資訊商，希望電訊商做好把關責任。叮！問題存在多時，如果現行法例有漏洞，點解唔提出修訂？點解唔透過發牌制度向電訊公司施壓？電訊管理局究竟係反應遲鈍，定係闊佬懶理？一句「冇權力」就將監管失職責任推得一乾二淨，納稅人仲養呢個部門嚟做乜？

話時話，近年有關電訊服務嘅投訴愈來愈多，個案愈來愈離譜。那渣招拉客累死人，推銷員因上司壓力，為求做夠單不擇手段，服務貨不對辦，中招易甩身難，呢啲畸士三幾日就爆一單。消委會今年頭五個月收到涉及服務行業嘅投訴入面，電訊服務排第二，早就「不能容忍」啦。

傳媒唔踢爆，商務及經濟發展局就繼續容忍，消委會一出聲，電訊管理局就將責任推晒畀電訊商。計太一叮話齋，最不能容忍嘅係呢班唔踢唔郁，唔爆大鑊唔做嘢嘅高官就真。叮！