聖誕將至，送禮物畀人變成一種藝術，否則分分鐘嘥錢兼嘥心機。立法會議員譚偉豪今個聖誕送嘅禮物好有心思，事關佢「處男下海」，買朱古力磚返嚟自己加工，炮製限量版「Samson's Chocolate」，真係氹到唔少人㗎。
IT豪尋日喺立法會捧住近三十排朱古力磚派街坊，每塊重三點三安士，佢話本來想買現成朱古力送禮，但驚畀人話冇新意，於是決定自己出手。佢先喺法國Valrhora專櫃買幾排朱古力磚，返屋企隔水煮溶佢，趁熱倒入朱古力模再放入雪櫃，急凍三粒鐘就食得。
就咁聽好似好簡單，不過IT豪話佢花咗好多時間去搵iPhone形嘅朱古力模，因為坊間啲模多數係星形或心形，唔啱佢心水。「Samson's Chocolate」有牌子、有漫畫公仔，仲有說明寫咗朱古力製作過程，睇嚟，IT豪大可以轉行賣朱古力。