全國政協常委兼建仔監委會主席楊孫西，前晚喺清水灣道大宅設富貴宴，秘密宴請二十六名建制派議員同四位中聯辦高層，討論當前政局，席間大歎鮑魚、名酒、靚茶，唔少仲係有錢都未必買得到嘅高級嘢，仲附送參觀二萬呎嘅豪宅。
前日傍晚七點正，好多建制派議員殺到，楊孫西帶大家暢遊大宅兼欣賞其私人珍藏嘅名畫同古董。晚飯係一系列傳統福建家鄉菜，除咗議員誇張形容嘅手掌咁大隻鮑魚同網球咁大嘅蝦球外，仲有炸蟹鉗、手撕雞、魚丸椰菜湯、福建炒飯等佳餚。
最特別係佳餚配美酒，當晚奉客有多支茅台協會御用藍色樽「五十年茅台」同法國新鮮紅酒，仲有上等「大紅袍」，每人臨走仲獲贈福建武夷山「正岩肉桂」茶葉。據講楊孫西席間話：「我屋企都冇乜名畫古董嘅，大家飲茶飲酒啫！」呢句話真正過謙囉。