身份多嘅人遇到嘅掙扎都特別多，富貴黨副主席張宇人就係一個超級夾心人嘅例子。尋日立法會表決《公職人員薪酬調整條例草案》，富貴黨一向支持政府減輕成本，梗係撐減薪啦，但肥仔張就忍唔住大吐苦水，話太太喺大學教書，減薪又會影響佢代表嘅飲食業界表現，所以投票支持都唔容易，仲擔心減薪條例落實後太太一定閂水喉，睇怕未來幾個月都冇得出街食飯。
肥仔張話，太太喺大學教書，仲係高級嗰隻，實受今次減薪影響，仲爆早輪叫太太一齊出街食飯，就畀張太窒佢：「你有好多錢咩，我依家畀人減人工呀，不如你慳番啲食飯錢補貼畀我啦！」家吓真係要減薪，張太實要求佢禁足外出用膳都似。
除咗肥仔張之外，多名議員都申報自己係今次立法減薪嘅直接或間接受害者，包括本身喺醫管局做嘢、薪酬調整同公務員掛鈎嘅醫學界梁家騮同工聯會潘佩璆，以及喺政府資助院校教書嘅專業會議梁美芬，不過佢哋最後都冇避到席，唔理利益衝突嫌疑，投票反對草案。