立會近排多喜事，繼兩名議會成員結婚後，白鴿黨主席鐵頭仁何俊仁尋日都傳出嫁女喜訊，呢排畀黨內麻煩事煩到心情麻麻嘅鐵頭仁，尋日終於露出久違嘅笑容。雖然佢話婚禮一切從簡，但都會擺四十幾圍酒㗎。
鐵頭仁話，女婿從事金融業，係個女喺加拿大讀書時嘅同窗，兩人嘅婚禮訂喺下個月舉行，即係何家喺二○一○年頭就辦喜事。問到佢對女婿有乜意見，佢就話最緊要個女鍾意就得啦！咁幾時抱孫呀？鐵頭仁笑到見牙唔見眼，話邊有咁快抱孫吖。
涂謹申新婚，一眾白鴿黨人齊齊去飲，今次又點呢？鐵頭仁話，打算婚禮一切從簡，低調進行，所以佢唔打算請官員去飲，只係喺酒店宴請親友。