香港喺啱啱結束嘅東亞運創下佳績，含金量最重嘅金牌之一係港足踢贏日本，連日嚟港足贏盡掌聲，尋晚又獲賽馬會舉辦活動嘉獎。尋晚跑夜馬，馬會搞咗個「香港體壇傳奇祝捷會」，由主席陳祖澤頒發獎座畀香港隊，表揚球隊對香港足壇嘅貢獻。有份入場嘅入球功臣「陳七」陳肇麒話，今次係首次踏入馬場，亦從未試過投注賽馬，咁好仔，唔怪練到咁好波啦！
香港代表隊領隊羅傑承同足總主席梁孔德負責率領港足入場，兩人對球隊獲馬會表揚感到相當高興，羅傑承希望為香港足運繼續作出貢獻，佢同梁孔德均希望政府今後加大力度投放資源支持香港足運發展，最重要係提供更多足球場同訓練場地。
