本文重點
五區總辭計劃擾攘一個月後,好似滾水淥豬腸咁愈淥愈縮,公文袋執委會日前開會定調之後,個計劃亦正式降格為泛民兩股小勢力參與嘅遊戲,而泛民大黨白鴿黨同呢兩個小圈子嘅矛盾亦更大。
佢哋嘅紛爭尋日又喺立法會上演,社民連主席黃毓民更直踩白鴿黨已變身保皇黨,仲大翻其黨鞭司徒華嘅舊帳,話會將華叔八月話支持五區總辭嘅講話聲帶製成補選嘅競選宣傳品,呢鋪華叔仲唔畀人擺上枱?
質疑白鴿黨變咗保皇黨
立法會尋日召開大會,泛民嘅總辭恩怨並冇降溫,仲燒埋其他議題,社民連嘅「大舊」陳偉業同黃毓民喺政府立法減公務員薪酬嘅條例辯論上,不約而同針對白鴿黨,大舊唔點名批評支持立法嘅大黨公然違反法治,出賣基層,一棒分打白鴿黨同建仔。
毓民跟住發言更指名道姓批評白鴿黨嘅張文光,話佢立場轉變,質疑白鴿黨已經轉軚變咗保皇黨。雖然張文光即刻解釋今次只係因為當局遵從機制先支持,並非轉軚,不過毓民並唔接受呢個解釋,轉過頭仲喺議事廳外開火,質疑白鴿黨腳軟,又再翻華叔喺總辭事件嘅舊帳。佢話華叔八月初接受一個電台節目訪問時,曾大大聲話過「五區總辭應該做,值得做,快啲做」,而且泛民第一個總辭名單都係華叔提嘅,質疑白鴿黨立場反覆。
毓民仲話,華叔呢句「應該做,值得做,快啲做」講得咁好,佢會將聲帶製成補選嘅競選宣傳品,喺大街小巷甚至宣傳車上播出。係人都知,華叔因為唔支持總辭踢爆幕後黑手飯局,又喺電台火併社民連嘅陶君行,如果佢嘅聲帶畀毓民攞去做競選宣傳,實在係一大政壇笑話,更係明擺華叔上枱,變相「綁架」佢嘅聲音。睇嚟,白鴿黨同社民連嘅恩怨勢必愈嚟愈深,愈嚟愈難化解。