小白觀點：商罪科消委會應介入

依家啲o靚妹真係吖，玩網上拍賣玩到冇嘢好賣，連貞操都可以善價而沽，據講個價錢bid到幾萬蚊，簡直離晒大譜！唔係咩，咁樣公然呃人都有，有冇搞錯呀！

你知啦，上一輩嘅女生就話冇辦法啫，冇咗隻「豬豬」，最多賴踩單車，但如今科學昌明，雞蛋都造得出，更何況係貞操？有睇過余華本《兄弟》嘅都知，呢個年代幾乎係冇「處」可尋，所謂嘅「處美人」百分百係造假。商業罪案調查科冇理由畀人咁樣招搖撞騙，而消委會亦唔可以坐視不理，好應該介入事件，搵期《選擇》月刊做埋測試，並規管賣處要列明有幾多成新，以免日後有苦主上街遊行話畀人誤導啦！

網友觀點...X）...

[　B　記　]

道德淪亡，為錢可以乜都得，我就唔信係初夜喇！

[　超超共　]

啲o靚妹咁等錢使，都係為咗買名牌、還卡數啫，唔通為學業咩！

[　Helen　]

幾萬蚊一個初夜，會唔會搞到自己cheap咗啲呀？

[　Emily Tam　]

啲o靚妹真係開放到冇得救，社會風氣咁差，依家點敢生仔女吖~~

網址：www.sunsiupak.blogspot.com

阿豪觀點：檢測驗證處女有前景

少女上網賣初夜？嘩，有冇搞錯！

不過從另一個角度嚟睇，都可以話係性觀念上一個小小嘅「進步」。以前成日聽到有o靚妹話，覺得隻「豬仔」係一份禮物，要送畀自己最親愛嘅男朋友仔，於是乎平安夜就變成失身夜，少女就咁將自己嘅身體當「聖誕禮物」送出去。依家好嘞，想要初夜？唔係未聽過「天下沒有免費午餐」呢支歌仔呀？梗係價高者得啦！

仲有，如果呢一種競投成為風氣，肯定會有「不良商人」賣假貨，大家都知內地出嘅假處女膜已經遠銷至埃及啦，既然有人造假，就自然發展出驗證嘅技術，到時「檢測及驗證」肯定會成為第一個跑出嘅優勢產業。

網友觀點...X）...

[　初夜之鬼　]

依家啲後生仔究竟諗咩？好賣唔賣賣初夜，遲啲冇錢使係咪要賣埋肝同腎？

[　匿　名　]

背後可能係集團式經營……幕後操控處女接客……

[　發水面包　]

好搞笑，拍賣網連初夜都有得賣，但點知佢係咪真係初夜呢？呢啲又冇得驗嘅，容乜易嘥幾萬銀買「假嘢」o架。

[　學生哥　]

學生哥初夜一個，有冇人買？倒貼兩舊……

網址：www.lukchiho.blogspot.com