事關明年九月就正式推行新嘅中學教學語言政策，凍結咗十一年嘅英文中學數目大解凍，中文中學同英文中學要大執位，表面上唔會再有「中文中學」同「英文中學」之分。之但係，香港社會不嬲重英輕中，雖然冇咗英中、中中嘅標籤，好多家長都想自己嘅細路可以入英文中學，即係多英文班嘅學校。

可惜當局只顧推行所謂微調政策，根本唔理學生家長嘅感受。當局出版嘅《中學概覽》列咗全港四百幾間中學嘅資料，但就唔肯透露每間學校有幾多英文班。原來當局明令唔准喺概覽上列明英文班數目，又話如果家長嚟問，就可以向佢哋解釋咁話。不過，有家長投訴，好多學校根本唔肯接聽家長嘅電話，或者用「唔識答、唔講得」敷衍。咁搞法，直情係剝奪咗家長嘅知情權。有家長直斥概覽內容令人大失所望，會造成選校大混亂。

其實又點止唔清唔楚咁簡單，直情係刻意誤導。比如，有啲英文中學本來已經「降呢」，只有少數科目仲係用英文授課，但仲死撐話係「以英語教學為主」，咁樣掛羊頭賣狗肉，家長分分鐘畀人搵老襯。叮！

話時話，今次嘅所謂「微調」一啲都唔「微」，直情係「巨變」至真。新政策規定，學校可按收生質素自行決定教學語言，用英文定係中文教學，由學校話事。咁樣做，等於將老懵董當年提出嘅母語教學大計打沉。

講起香港嘅教學語言政策，只可以用一個「亂」字嚟形容。嗱，回歸十二年，「改革」咗十二年，但係愈改就愈亂龍。開頭愛國心爆棚，推廣母語教學，劃分中中、英中，點知變咗標籤效應，後來又搞乜嘢上落車機制，仲嫌唔夠煩，又推出所謂微調，兜兜轉轉，令學校、教師同家長無所適從。最慘係班學生，直情變咗白老鼠，畀人玩到殘，卒之中英文都學到唔湯唔水。北大人成日都要香港人「不折騰」，但係香港政府就最鍾意折騰，叮！

再咁樣搞落去，香港真係會變成「冇語教學」嘞。睇嚟各位家長要為自己嘅細路諗吓計，如果想佢哋學好英文，就的起心肝送佢出去飲鹹水。如果真係想學好中文，就畀佢返祖國讀書啦。