小白觀點：起碼有倫敦同業墊底
無良的士司機明恰外國遊客，由尖沙咀去蘭桂坊，夠膽死收四舊水，人哋打死唔肯畀，司機惡到反鎖車門焗屈，仲Call埋成棚行家圍遊客添。有個英國美少女話：「好唔合理！我喺倫敦搭的士都冇咁貴！」呢個洋妞真係坐井觀天，見識有限，呢個世代，連增兵殺人嘅黑總統都可以堂而皇之咁攞和平獎啦，仲有啲乜嘢合理唔合理呀？
況且香港嘅無良的士司機，頂多收多些少啫，倫敦搭的士唔止貴，如果呢位英國妹唔係善忘嘅話，好應該記得當地曾經有個司機性侵犯咗數以百計嘅女乘客，畀多些少車資當買個安全感，唔去沙田蕉林都有「食蕉」護航待遇，四百蚊唔算太過分吖。
網友觀點...X）...
[ 宋某人 ]
係佢自己唔記得起錶先，仲要外國遊客支付四倍車資，我覺得佢犯咗濫收車資同非法禁錮囉。
[ Tereasa Tang ]
應該告佢啦，分明屈遊客，影衰晒。
[ 小肥 ]
四舊水可以來回機場啦，明屈仲班馬想打交，真係衰到冇人有！
[ 飛力 ]
出埋蠱惑招呃遊客，真係睇唔過眼，香港已經愈嚟愈少遊客嚟㗎啦，仲要畀外國人知道香港人咁冇人格，認真羞家。
網址：www.sunsiupak.blogspot.com
阿豪觀點：遊港打的隨時唔受保
不肖的士司機涉嫌濫收車資，兼且鎖門禁錮外籍遊客。講真，淨係讀呢單新聞都已經夠激氣，如果事件屬實，咁香港乜嘢架都畀呢班人丟清光啦！
呢單新聞，最令人印象深刻嘅一個情節，乃係有的士司機趕嚟找嗰幾個外籍遊客晦氣嘅時候，居然可以隨手就喺車尾箱擸木棍出嚟。嘩，惡成咁，我怕遲啲喺香港搭的士，都會被列為高危活動，旅遊保險都唔受保呀。
諗深一層，遊客就話可以唔嚟香港受罪啫，之但係仲有好多外國人喺香港公幹同生活㗎。計我話，有一個行業好有前景，就係組成護衞公司陪外國人搭的士嘞，就算每程收佢哋二百，再加本身車費都唔使四百啦！
網友觀點...X）...
[ 7仔 ]
呢條友真係影衰晒香港的士業界！！
[ 西裝友 ]
自己理虧呃遊客，仲惡人先告狀，希望警察快啲拉咗佢然後重罰！
[ 步GEN云 ]
呢啲害群之馬影衰晒本港旅遊業，最好重罰釘佢的士牌，唔畀佢再呃人。
[ 321 ]
香港嘅聲譽咪就係畀呢啲人整衰晒囉。
網址：www.lukchiho.blogspot.com
發表方法
讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。