煲呔曾早幾日去咗工展會購物做騷，但消費金額比舊年勁減八成，事後佢辯稱係因為今年唔使刺激經濟喎。而佢嘅「真兄弟」財爺鬍鬚曾尋日喺「香港經濟峰會2010午餐會」上發表演說，話舊年五月份嘅經濟就好似一個患重病嘅人咁，雖然過咗危險期，但體質仍然非常虛弱；依家事隔半年有多，雖然仲未知幾時可以出院，但可以肯定嘅係病情已有所好轉。
鬍鬚曾形容今年係動盪嘅一年，但好彩好快就可以過去，充滿希望嘅一年就要到來，預祝呢位病人明年可以好似佢一樣，早日康復出院齊齊迎接復甦。跟住佢又特別提到一向好推崇一代武術宗師李小龍嘅「Be Water」哲學，佢喺編製明年預算案時亦會謹守呢個「似水」原則。「Be Water」嘅原意係做人要好似水咁剛柔並重、善於應變，但睇番鬍鬚曾過往咁多份預算案，就難免令人擔心佢講緊嘅係「水皮」同「水分多」。
孖曾先後唱好全球同香港經濟，睇嚟係一早夾定計，齊齊打腫面充肥佬製造復甦假象，為明年預算案唔向市民派糖造勢。
不過市民眼睛係雪亮嘅，冇咁容易又畀孖曾嘅花言巧語呃倒，煲呔曾早前以差唔多嘅理由，拒絕喺十月施政報告加碼紓困，立即令佢同成個政府嘅民望暴跌。鬍鬚曾有前車可鑑仍堅持咁做，下年預算案嘅市民支持度同立法會贊成票數再創新低指日可待！