香港經濟未見起色，唔少大學籌款數字都見紅。理大尋日出奇招「撲水」，有「理大秋官」之稱嘅校長唐偉章喺慈善晚宴粉墨登場，繼早前喺歌星古巨基慈善演唱會上初試啼聲彈結他後，唐校長尋晚就同兩位校友夾Band，出動私伙紅色Taylor電子結他彈奏一曲由佢親自作曲嘅作品，引嚟全場哄動。支Taylor結他唔平o架，要成過萬銀，係唐校長來港後專登買嚟娛己娛人，尋晚終於大派用場。
理大仲請嚟著名工業家蔣震千金阿Ann蔣麗芸做晚宴籌委會顧問，幫手揼富豪心口，成功為理大撲水逾二百五十萬元。阿Ann亦出動唔少私伙鑽飾亮相，見佢手上戴住三卡鑽戒，腕上一條紅寶石手鏈同鑽石頸鏈互相輝映，閃爆全場。咁都未算，佢左腕上仲有一隻伯爵鑽石錶，購於兩個月前，盛惠十六萬銀。佢話全身行頭係用私己錢買，一毫子都冇揼過老公梁海明心口，所以話呢，時代女士果然有「食力」。