律師會會長王桂壎一向百足咁多爪，除咗花心思搞會務外，又識得彈結他、唱粵曲，尋日佢仲話嚟緊二月會預備跑馬拉松。睇佢身形有番咁上下，所以佢訂咗新目標，要喺兩個月減十五磅，務求操到最Fit去跑！
今年渣打馬拉松邀請唔同嘅專業團體領袖參加十公里馬拉松賽事，王桂壎都唔執輸跑埋一份，但佢話好多年冇跑過十公里賽，一定要減吓磅先去跑，如果唔係就會拖累隊友喎！
唔怪之得佢尋日食飯時，見到一直都好鍾意食嘅臘味飯喺面前都就住就住，係咁夾菜食而避開啲臘味，但最後都係忍唔到口，食埋最後嘅臘味飯先落實減磅行動。點都好，美食當前，仲要係心頭好，咁梗係食咗先再減磅啦！
其實佢都唔使咁擔心，事關早前佢去北潭涌嘅毅行者起步禮，中途遇到大塞車，佢為咗唔想遲到，叫太太幫手揸車，自己就落車行去起步禮現場，行咗一公里先到；點知走嘅時候又遇到相同情況，最後佢又行番一公里先可以搭車走。由此可見，佢嘅腳骨力夠跑全程o架喇，爭在跑得慢定快啫！