冠軍級練馬師「食力簡」簡炳墀係馬圈公認嘅有錢人，前日沙田馬場有國際賽，又見到佢風騷巡場，佢戴住隻「錶中之王」Patek Philippe經典名錶，不過係成二十年前嘅舊款，依家二手價大約五萬九。原來食力簡唔會盲目追求貴嘢，佢話至緊要用得舒服！
當日食力簡戴住嘅K金名錶，係Patek Philippe其中一個好受歡迎嘅錶款，勝在線條簡潔、硬朗，但原廠已經冇再出，依家喺二手市場嘅市價大約五萬九千蚊。Patek Philippe都有售價過百萬嘅鑽石錶，但簡Sir對呢隻錶咁長情，證明佢都係屬於務實一族。
講開行頭，佢戴住嗰副太陽眼鏡都唔簡單，係Cartier純金鑲邊嘅潮款，襯到佢成個機師咁有型。佢仲擔住支雪茄歎世界，每支要六百幾蚊，但佢話屋企仲有兩、三千元一支嘅貴價雪茄，呢支濕濕碎啫！