社民連之前為咗爭取白鴿黨支持總辭，一度暫停對該黨嘅攻擊，但前日嘅決定一出，立即又故態復萌，三名議員尋日喺記者會齊聲圍剿白鴿黨。毓民暗批白鴿黨一班老人家戀棧權位，死都唔肯將權力還畀年輕一代選民，言論已經算係最溫和嗰一個。大舊質疑白鴿黨破例批准黨員支持外人，其實只係為咗避免該黨爆發退黨潮，明顯係講緊白鴿黨創黨主席李柱銘又做「香港李登輝」，白鴿黨人聽到肯定㷫到反白眼。

長毛講得最絕，佢形容白鴿黨開完大會後，「好似照咗X光知條橫丫腸發炎，割咗咪好囉！」又話「（橫丫腸）唔會令你死，但會令你痛，依家割咗，大家可以健康各自上路。」

余若薇：民主運動要升呢

問到白鴿黨喺民主運動中嘅影響係咪會愈嚟愈細時，佢就話「橫丫腸係無關緊要嘅嘢」。咁講法，擺明係話白鴿黨係廢物，掉咗仲好啲，亦講明要同白鴿黨全面割裂，仲一腳伸走白鴿黨，唔使佢哋幫手助選。

咪以為淨係社民連至識窒人，平日講嘢溫文爾雅、好似蟻都唔敢踩死隻嘅公文袋黨魁余若薇，尋日講起白鴿黨嘅決定時都句句有骨。佢話民主運動係需要「升呢」轉型嘅，唔係淨係得死守同叫口號，要反問自己有冇盡力爭取真民主，強調依家行動係最緊要，明寸白鴿黨唔識「升呢」同爭取民主得把口。