銅鑼灣前晚驚爆「鏹水彈」，一個裝滿腐蝕性液體嘅膠樽喺行人專用區從天而降，落地開花，六名男女途人走避不及被灼傷送院，好彩冇生命危險。事發嗰陣附近維園有工展會，東亞運足球港日大戰散場冇耐，現場人頭湧湧，冷血狂徒居然揀呢個時候喺鬧市「贈興」，香港呢次乜架都丟晒。當初誓神劈願「不惜一切」捉拿鏹魔嘅曾蔭權同警隊高層，畀人剃光眼眉啦。

警方事發後又係封鎖現場、向附近大廈住戶及商戶派發問卷了解事件、收集商店閉路電視錄影帶，搞到鬼咁大陣仗。佢哋尋日話已經鎖定涉案大廈，喺大廈梯間檢獲一支通渠水，又話初步調查顯示案件同旺角多宗同類案件犯案手法相似，會一齊偵查。

咁啱得咁蹺，舊年十二月十三日，兩個「鏹水彈」由旺角行人專用區附近大廈飛落街，造成四十六人受傷。打後唔夠半年，旺角鬧市又兩次畀「鏹水彈」空襲。警方懸紅九十萬捉拿狂徒，仲裝埋「天眼」添，但一直破唔到案。

依家一年過去，「鏹水彈」投擲地點變咗銅鑼灣，如果係同一人所為，證明狂徒根本當警方冇到，仲改變「戰略」，玩鬧市游擊戰添。有本港犯罪心理學家話，兇徒揀一周年前夕呢個日子犯案係處心積慮，目的係想令事件更具震撼性，重挫警方威信，滿足自己嘅反社會心理。

事發之後，區內有居民話出街會抬頭望多兩眼，希望警方盡快破案；舖頭生意亦大受打擊，有商戶喺門口擺定桶水，以備不時之需；甚至有居民打算自組保安隊巡邏。連訪港遊客都話事件會影響佢哋對香港嘅信心，日後途經行人專用區會小心啲。

煲呔曾尋日去銅鑼灣案發現場「視察」嗰陣，除咗宣稱「令人氣憤」、責成警方全力緝兇呢啲廢話外，居然話佢明白呢類高空擲物案不容易捉到兇徒！

太一叮真係聽到把幾火，警方查咗成年，案發現場附近商戶同居民已經填過N次問卷調查，可以提供嘅線索已經畀晒警方。破唔到案，畀兇徒明剃眼眉，一句「不容易捉到兇徒」就想將責任卸乾卸淨。

叮佢個鎯鎯！鏹魔愈來愈猖狂，市民出街安全愈來愈冇保障，鬧市一年之內發生多宗「鏹水彈」空襲案，兇徒逍遙法外，警方束手無策，居民焗住靠自保。唔通真係要等旺角、銅鑼灣呢啲鬧市一個個變成水靜鵝飛嘅無人地帶，警方至肯做嘢？