立法會議員陳克勤同環境局副局長潘潔尋日親自下廚，教大家低碳飲食，從煮食出發保護環境。低碳飲食係指食少啲肉，減少因畜牧業所排放嘅二氧化碳等溫室氣體，煮食就主要用蒸同烚，用少啲煎、焗、烤、炆等要用好多能源嘅方法。克勤仔同潘潔尋日就揀咗煮西芹炒蝦球，兩樣食材都易熟，符合低碳要求。見佢哋煮得有板有眼，梗係埋去問吓啲煮餸貼士啦！不問猶自可，一問至知佢哋只係表面低碳。

克勤仔自爆話佢雖然少入廚，但最拿手就係煎牛扒氹女友，一年起碼整一次，但煎牛扒都花唔少時間，呢味菜真係一啲都唔低碳。潘潔就話老公最鍾意食獅子頭，所以周末到佢掌廚時都會整嚟氹吓老公，不過獅子頭多肉之餘，仲要先煎後炆，閒閒地都要炆一個鐘，同樣唔多環保噃！睇嚟如果克勤仔同潘潔要貫徹低碳嘅話，真係要改吓煮食習慣喇！