華懋集團前主席「小甜甜」龔如心嘅千億世紀爭產案，預計會喺呢個月二十至二十六號嗰個禮拜宣判，其中二十三號正係陳振聰嘅五十歲生日，小甜甜胞弟龔仁心就已經諗到陳振聰會收到乜嘢做賀禮，就係由法官宣布華懋慈善基金勝訴，送「拜拜」兩個大字畀對方！
龔仁心尋晚喺以佢家姐命名嘅荃灣如心海景酒店大排筵席，盛傳力撐華懋基金嘅富商趙世曾，同埋小甜甜生前幾位得力助手吳崇武、區燕玲同王良煥都有到場恭賀，但佢哋唔係預早慶祝華懋基金贏官司，而係祝賀龔仁心細仔龔皓小登科之喜。
龔仁心喺婚宴場外表示，喺娶新抱嘅大喜日子，唔應該多講爭產官司嘅嘢，但講講吓佢又忍唔住話佢哋一方法理情兼備，相信官司結果應該係另一件喜事。問到陳振聰會喺宣判嗰個禮拜五十歲生日，龔仁心就話：「希望法官送個大禮畀佢，就係『拜拜』囉！」
佢新抱係台灣人，新奶奶好鍾意呢位新抱。新老爺祝阿仔同新抱白頭到老，最好快啲生番幾個孫畀佢玩。