訪美加食風睇雪？

點知立法會秘書處近日向委員會匯報，話佢哋同美加駐港領事館聯絡過後，發現溫哥華咁啱會喺嗰段時間主辦冬季奧運會，要將碼頭暫時關閉改做海上酒店區；而美國嗰三個北部沿海城市，每年喺嗰段時間都會刮起大風雪，大部分航班同海濱活動都會暫停，甚至連鐵路都會封閉，外訪團去到除咗食風同睇雪外，根本乜都做唔到，成班議員簡直笑死人兼失禮自己。

點知民政事務委員會最近又密謀進行另一次外訪，最離譜係連外訪目的都未諗定，就叫秘書處做資料搜集。委員會上個禮拜五討論外訪計劃時，旅遊界阿Paul謝偉俊就批評有關做法猶如「乾隆下江南」，勞師動眾兼浪費公帑，質疑班同事係咪為外訪而外訪。

另一議員張文光亦質疑外訪團行程緊迫、趕頭趕命，係咪真係有助了解當地嘅文化同政策，仲講明即使委員會通過外訪，佢亦唔會為咗啲免費機票同食宿而報名參加。但委員會最後仍決定向全體委員發出問卷，詢問佢哋想去邊度「外訪」同幾時出發，外訪目的就暫定係考察當地嘅文化藝術政策。